«Қызылорда облысы бойынша «бір терезе» қағидаты негізінде үкіметтік емес ұйымдарға қолдау көрсету үшін азаматтық орталық жұмысын ұйымдастыру және дамыту»

«Қызылорда облысы бойынша «бір терезе» қағидаты негізінде үкіметтік емес ұйымдарға қолдау көрсету үшін азаматтық орталық жұмысын ұйымдастыру және дамыту» жобасы аясында «Қызылорда облысының Үкіметтік емес ұйымдарының Альянсы Ассоциациясы» Заңды тұлғалар бірлестігінің ұйымдастыруымен 2021 жылғы 22-23 маусым күндері Арал ауданында «Қоршаған ортаны қорғау және экологиялық қауіпсіздікті қамтамасыз етуге бағытталған бағдарламалардың орындалуы бойынша» экологиялық және әлеуметтік бағытта белсенді жұмыс жасайтын үкіметтік емес ұйымдары жетекшілерімен көшпелі кездесу ұйымдастырылды.

Көшпелі кездесу қатысушылары Арал ауданында жүзеге асырылып жатырған әлеуметтік жобалардың жұмысымен танысып, экологиялық бағыттағы жобалар территорияларында болып, өзара тәжірбиелерімен бөлісті.

Арал ауданының үкіметтік емес ұйымдары бүгінде Ақшатау, Қамбаш, Көкарал, Қаратерең жобалық территорияларында қоғамдық ұйымдардың тұрақты дамуы, тұрғындарды жұмыспен қамту, әлеуметтік кәсіпкерлік бағытындағы жұмыстарды нақты жолға қойған.

«Арал теңізі» қоғамдық бірлестігінің балық қорын көбейту мақсатындағы жобасы «Ғаламдық экологиялық қордың» қаржылай қолдауымен Ақшатау ауылында көлемі 16х30 метр болатын балық шығаратын инкубациялық цех жұмысын жүргізу үшін жасалып, бүгінде тұрақты жүзеге асырылуда. Бұл цехқа Ресейден УЗВ аппараттары алынып қондырылған. Жоба серіктестері «Жамбыл» өндірістік кооперативі. «Арал теңізі» қоғамдық бірлестігінің төрайымы Айнагүл Баймаханова жобаны жүзеге асыру барысы туралы, жоба әзірлеу бойынша өз тәжірбиесімен бөлісті.

Сонымен қатар, «Ақтолқын арман» қоғамдық қорының төрағасы Абдиков Әділжан Қара көлде балық өсіріп, оны аулап жұмыспен қамтылып отырған балықшылардың еңбегімен таныстырды. «Өрлеу-Консалтинг» қоғамдық қоры директоры Жұпан Дастанбек «Энергия көздерін тиімді пайдалану, жаңа технологияларды қолданысқа енгізу» жобасы нәтижелерімен бөлісті. «Арал мүмкіндігі шектеулі мүгедектерді қолдау» қоғамдық бірлестігі директоры Жұмашова Индира мүмкіндігі шектеусіз жандардың өз цехтарында әзірлеген өнімдерімен таныстырып, экологиялық таза өнім шығару, яғни түйе жүнін өңдеп оны тігіп отырған көрпе, жастыққа пайдалану мақсатында ашылған цех жұмысы қыр-сырымен бөлісті. Әлеуметтік кәсіпкерлікті дамыту бағытындағы өз тәжірбиесі негізінде әріптестеріне кеңес берді.

Қызылорда облысының Азаматтық Альянсы Ассоциациясы көшпелі кездесудің нәтижелі ұйымдастырылуына қатысқан Арал ауданының Азаматтық ұстанымы мол тұлғаларына өз алғысын білдіреді.